دخيلكم شو هالدني هاي ، صار اللي بينهبل اكتر عندو متابعين اكتر …، هاي غير اللي بزيدو متابعينة فجأة …
يا عمي توفى الفنان الكبير سمير غانم ، والكل زعل ، وكان في عرس وكمّل، ،طيب منيح ما الحياة بدا تكفّي ، لشو الزعل وتخبيص الحكي شو بدكن بالعالم ، اللي قامت بواجب التعزية وراحت تسهر المسا معزومة على عرس ، يه لالالالا، خلص صرنا ٢٠٢١ وكل شي صار على المكشوف ، انا بقول شو ما في غير يسرا عزّت بالنهار وسهرت بالليل ضروري نرتاح شوي ، والفانزات مفكرين حالن شي …لا بدنا نروق ومش كل مين قعد وكتب ورا تلفون صار بيفهم .
بلا زغرة في نقّاد وصحافية قاعدين ورا مكاتب وما بيعرفوا بشي ولا عندن فكرة عن شي …..قال شو ،كلو مدووخ بمسلسلات رمضان، ٢٠٢٠ والموت ابدعوا لا بدنا نروق شوي ، بدنا نرجع نحمل القلم الأحمر ونصلّح ونصلّح كتير اشيا، وينها عايدة صبرا ما عم بتعلق على التمثيل قاعدة بكندا بالها بالنقابة، بدها صوتها يوصل للنقابة، يا كبيرة يا عايدة خلص انسي شو في عنّا بلبنان لانو ما في نوى ،اسمعي مني وسكّري على الموضوع، خلص تقبريني نادين نجيم استاذة بالتمثيل وطوني عيسى بركّب شخصية بنصف ساعة ، وكارين رزق الله ملكة الشاشة ، وكلوديا مرشليان بتعيد وبتكرر كتاباتها، ونادين جابر ديريها على سرقة نصوص، وباسم مغنية بحب الكل ، وتلاميذ الجامعات بعدن بالبيت ناطرين يمثلّو ، بدل ما يكون ٩٠% خريجي معهد و١٠% هواة ايه عنا بالعكس، متل مجلس النواب ، متل كل شي بلبنان….بس انا مش قهرني الا الخسّات اللي على راس كم صحافي فلجوني، يا جماعة الفن وينكم ؟ عم يتعلموا كيف يجيبوا فولير كرمال بركي يمشي سوقهم….
مش مجنني الا ماغي بو غصن ، ملاّ سند يخرب زوقك شركة إنتاج بامها وأبوها، تقبريني يا ماغي اذا بدك ترتاحي انا بستلم عنك ، يا حبيبتي الزواج متعب، بفهمك، خليني جرب محلك شوي، بركي بصير عندي برنامج على الهوا …ما انا متلك شاطرة بس انت محظوظة وانا مدفوسة، من ورا الكومبيوتر ….
كلوديا بليز خلص روحي مع راحوا وما ترجعي ، خلص تقبريني جمعتي مصاري عيشي انبسطي ، ضعفي شوي شلحي الأسود كزدري ، شوفي الدني ….وحياتك الدني ما بتشبه المسلسلات…
