عبّرت الفنانة الكبيرة لبلبة عن سعادتها بالمشاركة في فعاليات مهرجان القاهرة السينمائي الدولي في دورته الـ46، مؤكدة أن رسالتها في الحياة والفن هي إسعاد الناس وتقديم أعمال تُدخل البهجة إلى القلوب.
وتحدثت لبلبة عن شغفها بالفن قائلة: ربنا خلقني علشان أقدّم حاجة حلوة للناس وأسعدهم، ولسه فيه حاجات كتير معملتهاش.. اللي شافوه مني هو نص قدراتي في التمثيل.
وأضافت: نفسي أعمل أدوار صعبة تحسس الناس بأشياء مهمة.. نفسي أقدّم عمل عن الإعاقة، سواء أكون فيه معاقة أو أم لطفل معاق.
وجّهت لبلبة رسالة مؤثرة إلى الجمهور: عايزة أقول للناس أوعوا لما تشوفوا حد معاق تضحكوا عليه.. لازم نحترم ونحب الناس دي، لأنهم عندهم إحساس ومشاعر زينا بالضبط.
وأكدت رغبتها في تجسيد دور أم لطفل من ذوي الهمم لتوصيل رسالة إيجابية بأن الطفل المعاق “ملاك” يستحق التقدير والحب.
تحدثت لبلبة بصراحة عن رؤيتها للحياة الأسرية، فقالت: الناس بتتجوز علشان تعمل أسرة ويبقى عندهم أولاد، وأنا بشجع كل الناس تتجوز ويبقى فيه أسرة وطفلين أو تلاتة”.
وأضافت بأسى واضح: أنا كان نفسي يبقى عندي أولاد.. كان نفسي أخلف 3 ولاد. بحب جمهوري جدًا، ونفسي ربنا يديني العمر علشان أقدملهم حاجات يرضوا عنها.
