حرب ماريو باسيل وهشام حداد ، ايه انا بدي سميها حرب ، وبونيتا سعاده بدنا نروق وما نصدق حالنا كتير ،بكفّي بقى ناس تتعدى على مهنة التمثيل …
ماريو بحقلّوا اللي ما بحق لحدن منكم ، اولا ماريو مثقف ومتعلم والخبرة التي يمتلكها بالمسرح لا تقارن مع هشام وبونيتا …مع كل احترام يعني…
ماريو اللي تعب وأسس مسرح الشونسونيه، وأكيد هشام شطّور وتعلّم كتير من ماريو ،وما منكر انو ذكي كتير ونجح انو يقدم مادة بتضحك الناس ، بس بعيد كتير عن انو يقدم عمل مسرحي متكامل ، وبونيتا تقبرني شطوّرة عندها موهبة التقليد ،بس ما منعرف اذا بتصلح انو تكون ممثلة ، فيا تمام بليق روق علينا شوي …خلينا نهضم اللي عنا بالاول.
هشام الرقم واحد في البرامج الساخرة، وهو يعترف انو ليس بممثل، هوي ضيف بالأعمال الدرامية ،وانا بحب كتير انو هشام بيعرف حجمو بالتمثيل ، واذا عندو مشاكل مع ماريو باسيل نحنا ما منعرف شو اللي بصير بالكواليس بس اللي الست فهيمة بتعرفو انو ماريو بيشتغل كتير على الممثلين وشفنا وين كان هشام قبل ماريو ووين صار …
وبلا ما ننشر الغسيل ، كلكن ناجحين ولكن الكن جمهوركم ومنحبكم…بعد في بالمسرح ما نشرنا غسيل …
وكرمال الدراما مين أشطر السنة ومين أفضل ، خلصنا بقا من هالاسئلة السخيفة ، برافو انو ارتفع مستوى الدراما وكل عمل شغل حلو ،بعد في هالقطاع ماشي وكتار الناس اللي رزقها منو ، شركات الانتاج عم بتخاطر، ومنشكرها نحنا هلق بوضع ما فينا ننتقد، ببلد خربان متل لبنان لازم نتضامن ،
بس انا عتبي دايما على شركات الانتاج ،يا عمي لك جربوا الممثلين خريجي المعهد ، حرام خطي درسوا أربع سنين مش كرمال يقعدوا بالبيت ، اسمحوا لكتّاب جداد يفوتو على الخط ، برافو نادين جابر بس في غيرها كتير والله ، كلوديا مرشليان الى التقاعد وكارين تنبّش على غير بديع ابو شقرا ، خلص حبيبتي خلي يتنفس شوي ،ولوووو كم حلقة بعد بدو يركض وراكي ….
ناصر الفقيه تأخر كتير ليفوت بالدراما ، ناطرين نحضر دور العمر …
مروى غروب خلصنا ، صار بدها نفضا الشركة ، إعادة تأهيل وأهم شي اكتشاف مواهب كتّاب جداد ، مش مين ما كتب كتب ومين ما وقف ورا كاميرا ومونيتر صار مخرج دخيل الله ، هيك هيك عم بتخاطر ، خاطر بناس ما اخدت فرصتها ،ناس تفوقت بالجامعة ….
ايلي معلوف ما بقدر احكي معك ، انت بغير كوكب خالص ، كيف الطقس عندك طمني ، طلعت من على الرصيف او بعد ؟
