دي أسعد لحظة بحياتي ، نوال الزغبي رندحت هالشي مع فيلتر للوجه، مسحها هالفيلتر ،ياعمي مش كافيكن عمليات تجميل ؟صرتوا بفيلتر ؟والله مش عم نعرفكم من بعض .
بدي قول برافو ل كارين سلامة ، لانو بلشت تستقبل ضيوف بيشبهوها وبيشبهوا البرنامج تبعها ، انو ضيوف إعلاميين حلو نضوي عليهم حبيت حلقة ربيع فران ،”ياي شو قوص ياي” ،
وحلقة سعيد حريري ،ياي شو ما بحب يزعّل حدن ، بس قوّص وقال هني بيعرفوا حالن ،شو قصدك ،انجو ريحان و ندى بو فرحات ، أوكيه حبيبي مش مشكل بدك ياهن ما يحكو سياسي ويركزو على التمثيل ، ايه رح قلن انت ما سميتهم انا سميتهم انجو ندى تقبروني ركزّوا على التمثيل … بس انت حبيبي ركز على الإعلام ووقف تعطي رأيك بالممثلات لأنو صراحة صدمتني ما حبيت رأيك .
سيرين عبد النور تعود بعشر حلقات مع عادل كرم ، تحت إدارة المخرج سعيد الماروق ،واو واو، برافو سيرين ،”دور العمر” هيك اسم العمل، انشالله يكون دور العمر لالك ،من كتابة ناصر الفقيه ، ناطرة شوف شو رح يطلع من جماعة لا يملّ بالمسلسل هلق لانو في سعيد الماروق ،قطفتوني انا الست فهيمة رح أحضر ،لانه صراحة ب “لا يمل “ما كنت حبكن ، بس بركي بهيدا المسلسل أزبط .
يا عمي الدني حظوظ ، عادل كرم وين كان وين صار … برافو عدّول ،بس خلص كبرنا هلق وبدنا نكون كبار بكل شي وبلا تخبيصات الجميزة شو فهمنا … صرنا كبار ، وأصلا انت طول عمرك شايف حالك …
سيرين انبسطلك كتير ،والله شو بس نادين وماغي بدن يشتغلوا؟، انت كمان قديمة ، والك محلك … وأحلى وحدة فيهم …
بس يا جماعة كأنو نسينا انو في كورونا وكلو رجع متل ما كان ، تخمين الكل تطعمّ وانا ما معي خبر …ياعمي انضبوا شوي ، بعدين شو الازمة بس على الفقير …. يي ولو ما تركتو مسبح ما رحتوا عليه، وبعدين شوفي كلو على تيك توك ، اللي بشوف اللبناني على تيك توك بغار منو وبصير بدو يجي فورا ، يا دللي لبنان بالصور والفيديو ما في أحلى منو بس بالحقيقة بيروت احترقت والناس نسيت وكملت تضربوا على هيك شعب ، نفخ وفيلتر وهيك تيك توكات ،بالزمنات كانت أمي تقلّنا بلا طق حنك …ونقطة ع السطر
