يا حبيبي يا وائل كفوري ، الشيب لابقلك وانا كمان الشيب طلع عندي وكتّر ،بس انا ما بسترجي نزّل فيديو كليب مع الشيب لاني مني” البنت القوية “….
طقبر عضامي يا وائل ، شو هالكليب، قدّ ما هو قوي إخراجياً ما لاقيت اسم المخرج ، لانو أكيد في إخراج.
ياعمري انت ،في لقطات نسيتو تلوّنوها ،يا نور عيوني ، عيب والله عيب ،جرصة …بدنا نوفّر؟ ما في دولار ؟الازمة على الكل ، حتى بل coloring, لأ مش مقبول ولا مسموح تطل بهيك كليب ، ولو مقصودة ؟اه اه انا قلت هيك…
بحبوك كتار ،واللي بيعرفوك قلال ، من ايام ستديو الفن ، الله يرحم سيمون اسمر علّمكن كتير ، بس ما تعلمتوا شي ،انت وكتير….
يا حبيبي طليقتك بتحكي والناس بتصدقك انت، بس المهم انت ما تحكي ، لأنو قد ما جربّوا يعلّموك ما زبطت معك ، غنّي وبس ، هلق صار بدك تنتج وتعمل كليب مع العيلة بالجنينة عندك ؟….برافو اسم كبير ولا نختلف ،صوت رائع ولا نختلف بس لهون وبس. .كتير هالقد يا وائل
-سيرين عبد النور ،فهمنا انو نزل المسلسل ، والله فهمنا وإخراج المبدع سعيد الماروق كمان فهمنا ، مارح احكي عن النص لانو ناصر الفقيه ما بعرف قديش في يكتب مسلسل ، بعد ما حضرنا ،بس حاضرين أشيا كاتبها مع عادل كرم ب أبو رياض ، وضحكنا ورجعنا زهقنا …أصلا أصلا كلو عنا صار كاتب ، مش غلط بس كلوديا مرشليان مسيطرة ، ونادين جابر سارقة النصوص على خطى كلوديا ،كلني امل انو ناصر الفقيه مش سارق النص الى اشعار اخر …
بس تجي عندي الكهربا ببقى بحضر وبخبركم …
شو بدي قول بظل هالاوضاع لي عايشينها، بس بدي أعرف مين كتب نص سعد الحريري وكتب قفلة المسلسل تبعه …
بدي أطلب من اللي بيكتب مسلسلات العهد القوي ، خلص بليز بكفي نزلوا الحلقة الأخيرة وريحونا كتير إثارة وتشويق ، بطل فينا، اطالب بالحلقة الأخيرة للعهد القوي وفيكم تستعينوا بالمخرج المخفي اللي أخرج كليب وائل ، وفي يكون بلا الوان لانو نحنا رجعنا الى ما قبل عصر التلفزيون الملون ، وصرنا كلنا يا ابيض يا أسود، يا فقير يا غني .
