مسلسلات رمضان، يادلك يا فهيمة شو هالبداية، ٤٠ دقيقة كل مسلسل ليخبرونا خبرية، شي اتجوزت، شي طلّقت، شي انخطفت، شي افلست، شي ما فهمنا شو رقصوا وانهبلوا ويا ريتن شبعوا، حاسي حالي ضيّعت وقتي، عصّبت، جلطوني…
انو معقول ما في مسلسل، من كل اللي حضرتن بعلقك من اول حلقة؟، ولو نسيتهن… النسيان بحالة المسلسلات كارثة ولك كيف نسيت، ايه والله نسيت شو حضرت وما بقي في شي براسي، مبلا بقي انو ماغي بو غصن عم بتشغل على حالها لتكون نجمة، زابطة معها شطورة يا ماغي، بس جويل داغر بالمسلسل ليش، تقيلة ما حبيتها ما بكفينا سماكة دانييلا جبتو جويل؟، اما بالنسبة للشباب شاطرين، الاخراج لا يعلى على فيليب الاسمر بس النص؟ يا دللي بدنا نشد حالنا شوي،دخيليك نادين جابر زهقتينا لهلق كل حلقة بحدث. يللا شدّي حالك حبيبي وبيّضي وجّك ما في منافسة ، انت قدها.
مسلسل “ظل ” حلو ،بس بطيء، جيسي عبدو فكّرتك اختها ل ماغي حبيبي لاقي شخصيتك، وياريت ما بتمثّلي مش لابقلك.
يوسف الخال كتير انبسطت شفتك، اشتقتلك. كتير .
الممثلين السوريين بمسلسل “ظل” ترفع لهم القبعة عبد المنعم معماري، او الكبير جمال سليمان. إبداع وابداع ويوسف الخال وما حدن غيرو لابقتلو الوقفة حدكن لانو قدّها وقدود، هو وايلي متري وانجو، بس رانيا عيسى حبيبي ما خلصنا هالادوار، لاقي شي جديد يا عيني لازم تشتغلي على حالك رنوش حبيبو.
نيللي كريم، كتير كتير بطيء المسلسل، كتير كتير عبّقلي على قلبي وقلبي من الحامض لاوي، ناقص بس تنقطع الكهربا عندكن، والله مش ناقصنا فقر وتعتير، تعبت من المسلسل بس بتستاهلي فرصة تانية لأنك نيللي كريم.
حضرت غيرن بس ما بعرفن حتى احكي عنهم، بدي اعتذر من جوقة عزيزة، نسرين طافش ما بتقطع مش قادرة أحضر المسلسل، ما الي جلد شوف إخراج عادل سرحان الفاشل بالكليبات اللي نقلو معو على المسلسلات، يي حرام فكّروه بسوريا ل عادل ،نجم الكليبات ،جابوه يخرج المشاهد الراقصة يا تعتيري، مشاهد راقصة والراقصة مش قاطعة حد الرقص. حبيب القلب وسام حنا كان على بالي احضرك لأنك شاطر وبحبك، بس مش هالمرة انا طافشة من نسرين طافش.
ريهام الحجاج قرّفتينا انت والمسلسل والقصة البايخة، وتمثيلك ما كمّلت اول حلقة ،عفوا منك بس العرس لحالو نصف الحلقة، ما قدرت كمل مشيت….
يللا برجع اكتب قريبا بس لاحضر وأهضم وبرجع بكتب ،الله يستر ما يكون مسلسل محمد رمضان نمبر ١ ،بعد ما حضرت بس قريبا بخبركن.
