يا رب دخلك شو هالكابوس؟؟ كلو ولا يطلع على بال وديع الشيخ يصير ممثل، لانو حتى قصي الخولي ما رح يقدر يعلّمو التمثيل.
بس شو بدكن بالحكي كتير صح وديع الشيخ يغني بعرس بلبل، بس زعلت على ماريتا، انو ولو بتجيب وديع الشيخ وال بابا عاصي الحلاني.
بلبل يا بلبل تمثيلك حلو ومقنع اكيد انت خريج معهد الفنون، خريج مسرح هالشي واضح يا حلو. مبسوطة منك وفيك لأنو بلشت تبين بيلبقلك…
تركيب الأدوار اشتهرو فيهم خريجي معهد الفنون، عبدو شاهين اشتقنالك، آخر مرة شفتك بمسلسل لا حكم عليه. بس حاسّي كانو عم برجع شوفك ب ٢٠٢٠، في حدن عم بيقلّدك وهيدا دليل نجاحك بالادوار او فشل الممثلين المتعديين على المهنة… بس التقليد الشاطر ما بكون بس بالتياب، لازم نعرف نمسك الشخصية، وما نزحّط باللهجة.
– طوني عيسى ما حبيت، لالالالا ما اقتنعت بس مش دايما الحق على الممثل، وين إدارة الممثل لي ما اشتغلوا مع طوني كان طلع شي احسن…
-٢٠٢٠ لو شو بدنا نقول القصة مش من تأليف الكاتب، بس القصة نجحت والناس عم بتّابع وانا عم تابع، الحقيقة تقال شغل حلو ويعطيكم العافية، بيكفّي انو رندة كعدي تألقت وقصي الخولي أبدع متل ما عوّدنا، وكارمن لبّس ظهرت لنا بحلة جديدة وأداء لائق وجريء…
-للموت اليوم صار يحسب الف حساب لممثليه وعلى رأسهم كارول عبود، التي عادت اليوم بهذا المسلسل للتذكرنا ان التمثيل الو اربابه….
-لعبة نيوتن المسلسل الأول لهذا العام ودون أي منازع، الف مبروك مصر، هوليود الشرق دائما وابدا…
-اسمحولي يا لبنانيي، ما فينا نتصدّر وفي على شاشاتنا مسلسلات متل ال باشا، يلي بضم ممثليين انا شخصيا ما بعرف منهم غير وجيه صقر.
يا ديعانك يا وجيه شو بدك تعمل، ايد لوحدها ما بتزقف… كل شتلة ولا التانية بالمسلسل.
كيف بدو لبنان يقوى ويصير رقم مهم بالدراما ولك كيف وفي مسلسل جمهورية نون. . . وراحوا، طيب الممثلين الشاطرين راحوا بدرب النص.
-الى شركات الانتاج وبالاخص الى الكاتبة كلوديا مرشليان، بليز بلا ما نفرض كارين رزق الله علينا… وبلا ما تقعد حدك بس تكوني عم تكتبي، وتضطري تفصليلها الدور. دخيلكم خلص بكفي كارين، صار الوقت ترجع ل فادي… حلّي عنو ل بديع ابو شقرا…
ملاحظة او قلكن بلاها…. يلا حبة أعصاب وبينبلعو الأخطاء مش محرزة، بس برافو بحب الثقة اللي عندكم وبالاخص ثقة المشاهدين فيكم…
