انا شو قلت؟
قلت انو بمسلسل ٢٠٢٠، رح تروح نادين نجيم، تعيش بيناتهم وتتحجب، قلت هيك ولا ما قلت؟ وزبطت معي، يعني القصة والشبكة والخزعبلات مارقة علينا، وانفضحت من أول حلقة. يا دللّي انا، ماريتا الحلاني شو كان بدك بالتمثيل، يعني ما عم بفهم اذا طلع على بالي انا صير محامية بقدر صير هيك، بلا ما ادرس ولا حتى كون ملكة جمال… وين النقابة وينها، النقابة على غير كوكب… ليش نقابة الممثلين ما بتكون متل نقابة المحامين وغيرهم….
لنرجع للمسلسلات
٣٥٠ غرام: عابد فهد و كارين رزق الله.
كارين شو قلت أنا يا حبيبتي؟ فلت لازم نشتغل على الشخصيات، اذا بيخلطوا كل الشخصيات اللي مثلتيهم بالخلاط صدقيني بتطلع شخصية واحدة، طيب ولو مش عيب، يا حبيبتي ما بيصير هيك، رزق الله على التمثيل، يا عمي عندك شخصيتين بس،
كارين مع فادي، وكارين ما بعد فادي، والله عيب.
ليكي ليش ما بتقصّي شعرك، ليش ما بتغيري بستيل تيابك، ليش ما بتحكي بغير طريقة… انو ما بعرف بس لاقي شي كرمال الناس ما يضيعوا، كرمال انت ما تضيعي…
شوفي ماغي بو غصن قديش بتشتغل على حالها، يا عمي بلا صغرة دانيلا رحمه عم تشتغل على حالها، هلق لفظها مش زابط بس برافو عليها أحسن منك بكتير.
عجبك هيك دانيلا أحسن منك هلق؟. (مازلت اتابع مسلسل للموت حبيت بس لو منوقف دخان، وبتشدّ عصبها دانيلا، ما بقى رح أحكي عن لفظها لانو خلص ما في نوى…)
عابد فهد رائع انت، شخصية كتير حلوة و جديدة، اوقات بكم مشهد حسيت انو اختفت الشخصية بس فورا بترجّعها، لأنك متمكّن، وأكيد ظروف التصوير أوقات ما بتساعد، بعرف انا كارين مش هينة بالكوليس اللبناني، طمّني انشالله ما زعجتكن بدبي، قولك استحت، ما بعرف اذا عندها خجل، لانو للصراحة هوي الخجل بالوقت الحالي مقطوع بلبنان…
عفوا عابد لن اتابع، مش زعل منك أو من النص لا أبداً بس ما فيي أحضر مسلسلين فيهم كارين بضيع، لانها هي نفسها ….
يا عمي اللي مش ممثل وخرّيج عم يشتغل على حالو و يطور نفسو، وكارين رزق الله بعدها متل ما هي، كارين بدّي شغل أحسن من هيك شو فهمنا…
زوج تحت الإقامة الجبرية (نسونجي بالحلال)
عودة رائعة للرائعة نادين الراسي.
أولا أولا بليز لازم تختاروا عنوان واحد للمسلسل مش أطروحة القصة. هالقدّ معقدّة القصة نختار عنوان، ولو ما في راس للعمل؟ راس واحد الو الكلمة الأخيرة؟ وانتوا ما بتزعلوا حدن، ما حبيتها منكم، لازم تكونوا واثقين بحالكم و بعنوان المسلسل.
اشتروا شوية ثقة، شوفوا كلوديا او كارين اذا بيبيعوا ثقة…
ثانيا اشتقنالك ، وكتير اشتقنالك يا بنت الراسي ، دوختي راسي بخبارك اللي ما بتخلص، يللا قريبا انشالله منفرح فيكي …
شو ما عملتي رح نحضر لانو اشتقنا لشكلك، المسلسل أوفر شوي كتير، عييط وصريخ أوفر شوي كتير، بس مش مطلوب أكتر من هيك من زياد برجي وأنجو والحلوة هبة نور …
مهضومين لذيذين، بس لو بتخفضّوا أصواتكم، بس حقيقة تقال على عجقة المسلسلات والعقد النفسية اللي مكتوبة، هيدا مسلسل بريّح المشاهد وبسلّي، نكتة بايخة أوقات بس مش غلط، مش مطلوب تحفة فنية، وإخراج متفزلك، الاخراج زاد على النص وهالشي واضح وزاد بلا ما يكون أوفر لانو بكفي الممثلين أوفر …
برافو لفريق العمل لانو كتير واصل للمشاهد قديش هني عم يستمتعوا بالعمل، وهشام حداد مهضوم عامل شخصية، بتفلت منه أوقات الشخصية بس برافو اكيد.
أنجو تقبريني صايرة أوفر كتير، شكلك من آخر مسلسل مع كارين عديتك، خفيفيلي شوية حب لكارين، وخلّيها تطلع منك…. كارين.
خلص ركّزي على حالك بالآخر انت ممثلة شاطرة، وثورجية ناشطة، كوني انت يا أنجو وأوعى تدخلي معهم بعمليات ومتفجرات بوجك …
بدي تابع المسلسل شو بعمل ما في غيركم مسلسل بلا عقد أوديب ….
ناطرتكم يا مهضومين، هشام حداد حبيتك وين بيتك ….؟؟؟
مسلسل: لعبة نيوتن، منى زكي
قشطة وعسل يا منى، كتير ناعمة وحلوة وشطورة، فكرة المسلسل حلوة و جديدة، مع نهاية الحلقة الأولى أكيد بنطر التانية،
كلنا بدنا نشوف كيف منى زكي رح تتأقلم بأمريكا و تعيش، فهل ممكن تبقى او تعود ؟؟؟ هل ستولد طفلها بأمريكا، حلو كتير الموضوع.
حلو كتير بالمسلسل انه ورشة كتابة، في مؤلف (تامر محسن) وفي كاتبة للسيناريو (مها الوزير) انشغل مع ورشة كتاب، هيدا الشي كتير صحي، وعالمي برافو، ويبشر بالخير …
اما الممثل محمد ممدوح، ترفع لك القبعة يوما بعد يوما، برافو برافو برافو ….
اكيد ساتابع …
غادة عبد الرزاق كنت قلت انه مسلسلك حلو ومخيط لالك وهيك، بس خياطة يسرا أحلى، بتصدّقي كان مفروض تابع لحم غزال بس نسيت القصة اليوم، عجقة كتير عليي، وما بحب الجزاريين انا، بس رح أعمل مجهود وكمل لانو بعرف انو شي حلو
مصر ام الدنيا، وأم السينما والدراما… بس سوريا كمان جديرة هلق رايحة أحضر شي مسلسل سوري ١٠٠% اشتقت لسوريا وأهل سوريا حبايب قلبي …. لي على بالو مسلسل مهم وتقيل في “قيد مجهول” تمثيل باسل خياط، و عبد المنعم عمايري، ونظلي الرواس…. عمل ترفع لهم ثماني قبعات، لكل حلقة قبعة، عمل مؤلف من ثماني حلقات ليس بسباق رمضان ولكنه ب ماراثون الدراما الثقيلة…
بس بضل زعلانة انو يعني السنة لا مكسيم ولا تيم، اه والله والله مو حلوة منكم…. ويوسف الخال وينو هيدا كمان شب حلو….
