مرحبا يا عمي، تأخرت عليكم، بس صار في كذا خبرية بدها وقت للهضم، وانا الهيئة ما عم بقدر أهضم، ما عم بقدر أهضم الغبا، التبييض، الضحك على العالم …
كيف بدي أهضم اعلام ما عم يحكي ولا بأي شفافية، ولا كلمة صدق، انو عن جد هلّق نادين نجيم تمثيل احترافي،لا، لا، بدنا نروق، هي نفسها بكل الأدوار مش اذا غيرت تيابها، وما حطت مكياج صارت ممثلة، بعدان لحظة شوي لشو المكياج ما كله بوتكس…
كيف بدي أهضم، نادين جابر كاتبة مسلسل للموت، وكل مرة بتكتب فيها تأليف، وهي بتكون آخدة الفكرة عن فيلم او مسلسل اجنبي، او تركي… والله مش عيب نكتب تأليف…
كيف بدي أهضم مقالات عم تنكتب عن كارين رزق الله وهي هي، ما حكينا عنها كم مرة، بدي قول لازم نشتغل على حالنا، نشتغل على كارين ما بعد فادي…
كيف بدي أهضم يوسف الخال اللي قوّص على عايدة صبرا ونعتها هي وتلاميذها بالحقودين، اللي ما وصلو لمحل (حسب هالبعد نظر المضروب عندو )،
لا حبيبي لهون وبس، بيكفي هلقد، انت بتعرف مين تلاميذها لعيدا صبرا؟ كل ممثل مخرّج من معهد الفنون الجميلة لما كانت الاستاذة عايدة تعلّمهم، هاو وصلوا للعالمية، في ناس أكيد منك سامع فيهم لانو هاجروا وبيشتغلوا مع فرق اجنبية، عمول غوغل غي ناضر، هيدا تلميذ عايدة، بس خليني خبرك تلاميذها لي انت بتعرفهم وبتعرفهم منيح مفروض اذا كنت بعدك عم بتمثل: رودريغ سليمان، ديمان عبود، سينتيا كرم، نيكولا معوض، نتالي سلامة، فؤاد يمين، ايلي متري… بكمل ام خلص بكفي؟ مين من هول شفت منو حقد يا بطل؟؟؟
ما بدها هالقد يوسف الخال، اذا قوصت على عايدة ما رح تاخدك كارين بطل، أذكى بكتير من هيك كارين، خلص هلق بعد عابد فهد أكيد مش رح تشوفك…
كيف بدي اهضم كارين سلامة وبرنامجها مع السلامة، بتخبّر خبار بالاول، ايه سرد تويتات، بلا أي تعليق، وبعدين بتستضيف ضيف، شي زياد نجيم، شي هشام حداد… دايما ضيوفها أذكى منها، وبتصير بدها تتذاكى وتحكي سياسي، وانو هي ماكسيموم فيها تحكي مودا….
وعلى قول نادين نجيم، لتهضمها خوض عصرة حامض مع سفن اب، وانا هيك رح أعمل، لاهضم مسلسلات رمضان، عصرة حامض ….
