بقلم ميراي عيسى
اليوم، بكتبلك يا خيّي، بحمل القلم، وبخفّة الإيد المشتاقة، تغنّجلك خدّك يا عريس كل المواسم، يا حبيب قلبي اللي ما إلو منازع..
اليوم، انت وعم تخطي خطوات الوعد بالفرحة والحب،صحيح مارح كون حدك تشمشم ريحتك المجبولة بالمحبة والدفا ،بس انا معك ولو مش معك، وبترجّاك تعطيني لحظة من وقتك، ومن بعدا كفّي طريقك وما تتطلّع وراك..
ما رح أعطيك نصايح، بدّي بس إتمنّى عليك ما تنسى تكون السند والدعم، ما تتأخّر تعبّر عن اللي بقلبك من حب وإعجاب، ما تتباخل بالغمرات والبَوسات والضمّات….ولا لحظة تخلّيا تكون متل التانية، جدّد كل التكات على عدد نجوم السما..للأمينة الأمّونة…أمانتك يا خيي وأمنَك وأمانَك…
هيي اليوم وبكرا وكل الإيام…. أنا وعم إكتب هالكلمات، رح تكونوا بأوّل خطوة سوا، رح تترافقوا بذات الدرب رغم الإختلاف يمكن بكتير إشيا، مش غلط، هيدا كنز….رغم التعب والخوف والقلق، وهاي كمان أوقات كِلاّ غِنى…رغم كل شي، ما تنسوا إنكن حاربتوا تتكونوا سوا، وسوا مكملين..
انت يا خييّ أكتر واحد بتعرف إنّو في قدرة عم تشتغل بحياتك، ضم مرتَك لإلك وخلّيا كمان تحت جناح هالقدرة العظيمة… بهاللحظة حاسّي حالي طايرة مع النسمات الخفيفة على غيمات هالسما الواسعة، راكضي صوبَك تإتأمّل عيونَك الفرحانة وإتطمّن يا خيي إنّو الإيدَين تشابَكِت …
ما تنسى إنّي بحبّك وانا دايماً حدّك….ما تهتم للمسافات، ولا مرّة قدرِت علَينا….
