تلميذك

شاعر المنبر سعيد الحاج

سْمِعتك عا تِمّ الحُبّ غِنيّه
كلماتها – شْمايل ورد أحمر
عْلَيْها السِحِر بيدوب حنيّه
أكتر ما دايب وِلفك الأسمر

وِسْكِرت بِنعومة نغم حسّاس
مسلوخ نَهدِه – عن وتر همّك
وِحْلَفت بَعدو عا نبيد الكاس
وْصفيّت إشرب خمر من تمّك

وتِمّك الأحمر – لِلْخمر كَرْكِه
مْطَوّب عا إسم الحجّ يا سمره
وكلّ ليله في إلي عَرْكِه
بين الشْفاف الحُمُر والخمره

ومِن بَعد سَكرَه مْجالها مجهول
سَرقِت حلم عمري من الوِحدِه
طْلِعتي معلّمة الهوى المعسول
وِطْلِعِت تلميذك أنا وَحدي

لكن كتابي مش ورق فتّان
وْلا حروف صُوره عن دموع العيْن
كتابي صدر عاجي بلا عنوان
وْبَدل اليتيمِه في معو تِنْتَيْن

ويا ما على التِنْتَيْن رِحت وجِيت
ونار حُبّي – نار حريّه
وْمِتل ما مَزمَزت خمر – قرِيت
عْرايس خَيال مروج بِكريّه

ويا معَلْمِه – وحياة أطيَب شهد
اللي طَعمتو بالقلب مغروسِه
مهما العِلم يِتطوّر بْهالعهد
رح ضلّ تلميذك عا طول العمر
تا ضلّ منّك آخد دروسي