قرّب رمضان وبلّشت العجقة، مسلسلات، ومسلسلات ومسلسلات، شو بدي لحق ل لحق، كتير هالقد، ما بقي في حدا ما عمل مسلسل، وما بقى في حدا ما صار بطل، كلو بدو مسلسل، وكلو بدو بوستر لألو، يا اخي صار المسلسل بينزلولو بوسترات على قد عدد الممثلين، هيك ما حدن بيزعل من الستار يقبروني، لو بيشتغلوا على تمثيلهم بدل شكلهم مش كان لأفضل؟
كتير عجقة عليي، يا عمي كم فيديو كليب بدي أحضر، قصدي كم تتر مسلسل بدي اسمع وأحضر، ناصيف زيتون، وله شيرين وله أصاله، وله زياد برجي الخ….
يا جماعة انتبهو اوقات عم بكون الجينيريك والغنية أطول من الحلقة.
كتير عجقة، فوضى، مصر عاملي مسلسل اسمه “حرب أهلية”
بطولة النجمة المبدعة يسرا، وباسل خياط، بحبكم كتير، بس اسمحولي فيها، حرب أهلية خلقت ل لبنان وبس.
-وعلى سيرة باسل شو صرلك انت، شو لي ضربك على راسك، شو عم تلبس حبيبي، مش زابطة معك ابدا، لي ما شاف تياب باسل خياط ما شاف شي، شكلو قالب على ت مربوطة، لا حبيبي ما اتفقنا هيك، خليت كل النسوان ينغرمو فيك وهلق صار بدك تلبس “بالورينها”، مش ضد هوديك، بس انت عم تعملها للفت النظر، مش لأنك منن، ولا لانو انت مدافع عنن انا أكيدة، ما لابقلك دور الكول مو لابقلك حبيبي…
كل التوفيق لشرك الانتاج، اللي بعدها عم بتصور، ولو صار معهم كورونا ما بياثر، الفن تضحية.
كل التوفيق للممثلين القديرين الشاطرين يلي أكيد دورهم مش بطولة، لانو أشطر من أنو ياخدو بطولي، ملكات الجمال البطولة الكم، وخريجي المسرح دور ثانوي.
هلق اكيد وكتر خير الله في كم ممثلة خريجة مسرح وصلت لدور البطولة، انا بحب ماغي بو غصن، سلافة معمار قبل ما تبيض لنادين نجيم، سلافة فواخرجي… عنا ممثلين حلوين بيرفعوا الراس،
وأكيد في اللي ما بيرفعوا الراس، مش غلط، نحنا العرب مرحبا التنويع والمازات ولو بيعملوا غازات….
-ياي حضرت اول حلقة من مسلسل راحوا، هالمرة مش سارقين النص من كاتب تركي لا لا لا، هالمرة ما حصل في تركيا،
القواص لي صار ب ملهى ليلي باسطنبول، وماتوا ناس، وصار في جرحى… الله ما يجرب حدن اكيد.
اه، نقلوا الحادثة وصار مسلسل لبناني، يلا فكرة جديدة، وغموض وتشويق. مش غلط ما فينا نقول منقول مش منقول، حلو مش حلو بعدنا بحلقة ١.
بس انو ليش برناديت حديب بدها تلعب دور عراقية، وتحكي عراقي، ما حبيت بس هيك، مع انه برناديت ممثلة قديرة، وشاطرة كتير بس رح تبقي حبيبتي دور ثانوي… الحقيقة بتوجع…
ياربي ما تجربنا، شفتو نورهان، لا، اللي ما شاف نورهان ما عرف شي، فضحت الفن وابو الفن “بهبلها.”
يعني كنا نقول معقول، معقول هيك من ورا كم غنية بيصيروا اغنياء، انو الفن رزقة…
اه لا نورهان كشفت المستور، كله هدايا تقدير للفن، والحب…
شطور نورهان، وكتير شطوووورة، بنظر حالها قدام المرآة.
-يا دلي انا وين صرنا، منيح تمام بليق بدو يرتاح شوي ب رمضان، لانو بين كل شتلة استضافها الله يكون معه،
كريستينا وتاجها، نورهان وشطارتها… لا كتير هالقد، اصلا نورهان حرام تطل على الشاشة بشهر رمضان ….
يلا شهر مبارك يا جماعة ….
