يا نوسك ويا روحي للكاتبة، يا عيوني ويا ضميري للمنتج، ما رح جيب سيرة المخرج لانو هو ما خصّو اكتر من الكاميرا وحركة الممثل والكاميرا، علماً انو المخرج فيليب أسمر بحط منخارو بكل شي، من سكربينة الممثلة لدبابيس شعرها، وانا مدام فهيمة بهني لانو أعمالو رائعة، شطّور …. يقبرني.
بس النص، يا روحي، النص، اللي بدو يانا نتعاطف مع تاجر المخدرات بمسلسل ٢٠٢٠، يا عمّي ما عم بفهم، موضوع المخدرات قلب روميو وجوليت. ومسلسل للموت، موضوع النصب والاحتيال قلب ذكى وتشغيل راس.
-تمثيل الصبايا، البنين والبنات، رائع.
وانا مبسوطة كتير كتير، فرجيتوني بديع ابو شقرا مش راكض ورا كارين بالمسلسل، لانو فعلا كارين وبديع بمسلسل راحوا هلكونا كم حلقة بدها لتقبل؟ وخلص….
-بس الحقيقة تقال، ماغي بو غصن أبدعت، لما سقط القناع عنها فعلا سقط، شفنا وجه تاني، حبيتك وين بيتك يا ماغي؟ والله حبيتك؟ والله اشتغلت حلو وحلو كتير، لكل اللي ما بيعرف، ماغي خرّيجة مسرح وهالشي واضح… الف مبروك نجاحك، الف مبروك يا ماغي.
-مبروك نجاح حبيبنا باسم مغنية، كمان أبدع متل العادة، ودانييالا برافو عم نشتغل على حالنا…
-في مسلسلات برمضان، لا، لا ما فيك تشوفن، ممنوع تشوفن، لك عيب تشوفن، انو ما بفهم ليش بيعملوهم، لازم يرتاحوا الكتّاب والمخرجين، “جمهورية نون”، عن جد في مخرج ورا الكاميرا، المخرج من اي موديل؟ لانه تعتير خالص عيب عيب عيب.
-انو في نص بيقشط، بيكون في ثغرات مش غلط، بس نص قاشط ومدمر من أول حلقة مصيبة، في مصيبة اسمها كتّاب.
مع انو بعرف في مواهب كتير، وينها؟ كل منتج معلقلي على كم كاتب وما بغيّر، غيرو شوي، انو ما في مخاطرة، يعني مش أغاتا كريستي اللي عم تكتبلكن. مش غلط اذا خاطرتو بحدا جديد، ما هيك هيك انتوا بعدكم بخطر، والنصوص اللي عم تعرضوها مش كتابة كريستي شو فهمنا؟ بعيد بعد مرة…
-بالنسبة للإخراج عندي سؤال جامعة NDU , ALBa, AUB… وينن اللي عم يتخرجوا إخراج. وينن يا جماعة، سياحة مع خريجي التمثيل هاهاهاها.
-يا أيها المنتجين، اللي بغير على ضرسو بينفع نفسو…. صدقوني
