دينا الشربيني كتير مدلوقة يا حلوة ، يعني كأنك مش مصدّقة انك عم بتمثّلي مع محمد رمضان ، للأمانة شاهدت اول حلقة وحسيت قديش انت مبسوطة انك عم بتمثلي، بس يا حبيبة فهيمة لازم نقبع الضفير ، اكلريك ما بيمشي مع الفقر والشحار والتعتير… ما فهمت شي بأول حلقة ما تواخذيني فهمي غليظ بهالرمضان .
حلو “للموت” بلش يحلى من حلقة أربعة، برافو دانييلا رحمه ، كتير في تقدم ،بس بدنا نوطّي الصوت شوي، طوشتينا صريخ وعييط ، وايحاءات ، ليليان نمري متل العادة بتلبس الدور لبس
كارول عبود شو بدي قول ، يا هيك التمثيل يا بلا….
ماغي بو غصن ، شو هالنص هيدا ، كتير كتير حواراتك بتضحك، وما بتلبق لا مع شكلك ولا مع لبسك، يعني دايما بحس في شي ناقص بهالشخصية، انو شكلك كتير كلاس وحكيك كتير شوارعي ،الفكرة مقصودة ؟ اذا مقصودة بقول للكاتب والمخرج والممثل لا لا مش منطق .
بديع ابو شقرا رائع ، اشتقت شوفك عم بتمثل لانو زهقت صراحة من ادوارك مع كارين خلص ممنوع نرجع لورا خليك حد ماغي بتوصل وبتوصل بصورة أحلى ،ولو انو نص مسروق من هون وهونيك، مش غلط ،مهم توصل بصورة المبدع فيليب الاسمر .
وسام صباغ ، حبيتو لمحمود، مشهد ماستر ، رائع يا وسام وانشالله بعد بيكبر دورك وبتوصل .باسم مغنية كمان مبدع ، والله والحق يقال الممثل اللبناني ب للموت كسح الممثل السوري برافو ، لما الممثل ينعطاه فرصة بيظهر احسنتم يا رجال يا خريجي المعهد .
يبقى “ظل” نقطة ضعفي السنة ، لانو دارينا الجندي اشتقتلها من كتير زمان ، وعبد المنعم عمايري وجمال سليمان و يوسف الخال وايلي متري ، اسماء كبيرة وقدرات عظيمة ، بتشدّ المشاهد ولو الاحداث بطيئة وكم بوتكس حدن ما بياثروا منغض النظر عنهم لانو بوجود عمالقة بالتمثيل ما بتعود تشوف اللي واقف حدن .
لا لا مصر شو صاير معنا السنة ، ب “طلوع الروح “كلو على بعضو ١٢ حلقة وبدكن تشطّو في ١٥ حلقة وتبلشو بنصف رمضان، ما اذا في شي السنة ناطرينو هو هيدا المسلسل ، عم بتصورو بلبنان كمان ، دخيلكن ما تتاخرو لانو ملّ قلبنا من المسلسلات المصرية السنة دي ما حبيت ولا شي ، انو معقول مصر تاخود نسخة اجنبية عن مسلسل ؟ليش يا الله بطّل في كتّاب ؟ شو عم بصير يا ناس ؟ ما تعلمتو انو النسخة دايما بتفشل قد ما اشتغلتو وتعبتو بس دايما النسخة الأولى هي الأصدقاء والأجمل والناس راح تقارن فهل يجوز المقارنة مع suits .
يسرا ما حبيت ،ونقطة. مسلسل مش لقامتك ولا لقدراتك مبهبط كتير عليكي النص ، انت اكبر بكتير .
مع وقف التنفيذ ، خلصنا تكرار الأفكار، وكسر عضم ملّ قلبنا والله الدراما السورية تعيد ما انتجت …
رح يطلع “للموت” الاول لانو مافي منافسة ،يلا مبروك جمال سنان بتستاهل.
