حدن يلحق سينتيا خليفة ، الممثلة اللبنانية اللي صارت بمصر ، وعم تلعب نفس الدور ولكن بمسلسلين ، الاول “ضد الكسر”، و اسمها مايا ، مصاحبة رجل متزوج وبتضهر معو ، والتاني حرب أهلية” بتكون متزوجة وبتضهر مع رجّال متزوج وبتخون زوجها.
انو عادي ناخد نفس الدور ، بس مش العادي انه بالمسلسلين بنفس الطريقة تفضح ، انو ولو نفس المشهد ، المرة اللي عم بيخونها زوجها مع سينتيا خليفة بتترك تلفونها على الطاولة ، وبتشغل recorder, ومن ورا air pod , بتتسمّع لحديث سينتيا مع زوجها وتتأكد انو زوجها عم بخونها معها…
طيب يا سينتيا ، بصير في توارد افكار بين الكتّاب ، ليش ما قلتي انو هالمشهد بالتحديد صورتيه بالمسلسل اللي قبل …
يا حبيبتي انت لما بينعرض عليكي درو ما بتقري ؟ ما لاحظتي انه نفس الدور بس أسماء مختلفة .
وبالنسبة للوك تبعك ، انو تيابك ولووووووو، ما في ذوق بالمرة ، لابستيلي ابيض طلس مع حذاء أسود بيقتل الصرصور بالزاوية
والله يا سينتيا خرقتي السوق المصري بس خلي بالك دوللي شاهين مش معتبرة حدن منكم ، هي السندريلا اللبنانية ، هي نجمة مصر الأولى، انه معقول دوللي شاهين بآخر مقابلة الها مصدقة حالا انو بتقدم فن الغناء والتمثيل متل ايام الزمن الجميل.
-والله لي استحوا ماتوا … بمقابلتها دوللي مع رالف معتوق ، بتكشف انو ضحكتها سبب نجاحها .وعلى فكرة انو انت شو لابسي ؟بيجاما ؟انه يابا صبحية ، طيب ياالله ليش منصير بمصر وننسى الذوق ، اصلا دوللي لو لبست كل تيابها مافي ذوق شفناك بالصيف وشفناك بالشتي .
بس الحقيقة تقال انو اذا بمصر بيعتبروكي نجمة ،فبلبنان مشكوك بالامر ، يمكن بس اللي تجوزتين بلبنان بيعرفوكي، على فوقها انا شفت مقابلتك لانو بتابع رالف …
-نادين نجيم “نهنهتيني”، بس مش كتير شوي استعملتيها، بمحلها ومش بمحلها … بس والله لابقلك الدور ، حبيتك وين بيتك؟ حد مرفأ بيروت ؟ما بقي حدن ما عرف هاهاهاها …
– ومن ورا تخبيص كارين رزقالله ،انا حبيت كل الممثلين السنة ،دانيالا رحمة حبيتها كمان. خلص في اشيا منتخطيها ومنقول ماشي حبيت …
-ماغي بو غصن تتألق بدورها ، باسم مغنية حبيتك شاطر وابن أصول بالمهنة… هول تلاميذ الجامعة ، ما بدي احكي عن النص الماخوذ من فيلم … وضعف الإيقاع، لانه فيليب أسمر المخرج أكيد شدشد قد ما في ، يعطي العافية ، بيكفّي انو صوّر مسلسلين بنفس الموقع ، وجرّب قد ما في ما يبين بس على مين ؟ هاهاهاها، بس الاكيد انه فيليب مخرج شاطر وفنان والو الف تحية وشكر لانه رفع مستوى الدراما .
-بس اسمحولي كارول عبود بطلة عمل ” للموت ” ، ترفع لك القبعة دخيلك كارول ما صدّقنا رجعتي على التمثيل بليز ما بقى تنفصمي وتبعدي الشاشة نحن والشاشة بحاجة لممثليين تقال متلك ….
-فادي ابي سمرا لذيذ دورك اللحام ب مسلسل ٢٠٢٠ ، حبيتك ، حلو الدور كتير ، وبس انا أنقل على مسلسل للموت كمان حبيتك ، شاطر اكيد انت خريج مسرح … بدي اسأل يوسف الخال هو أدرى بخريجي الجامعة …
-منى زكي انت ملكة رمضان السنة ،عذرا نيللي كريم ، ولكن منى أبدعت ، نيللي انا كنت بتمنالك دور أتقل ، ويمكن لسه ما بانش الدور بس بردو حقلك منى ذكي تحفة.
-“على صفيح ساخن “مسلسل جميل ، عمل كامل متكامل ، وأمل بشوشة ابدعت كعادتها، ايه عندها طلة و كاريزما ما فيك ما تحبها، وباسم ياخور وعبد المنعم عمايري ، سلوم حداد … ممثليين من العيار الثقيل، وموضوع المسلسل جريء وجديد .
