عزيزتي الدراما اللبنانية
انشالله تكوني منيحة، في ممثل اسمه ايلي شالوحي، اخترب الحي، وقلبه دق مع كارين، وهلق صار على رصيف الغربا، زعلان يقبرني ما حدن بزقف لحدن بهالمهنة، حبيبي برافو وهاي زقفة ما تزعل، قنينة شمبانيا للممثل الصاعد، ايلي شالوحي. صراحة مهضوم وقريب للقلب بس ما بعرف كيفو بالتمثيل، كيفك بالتمثيل انشالله منيح؟
…طوني ابو جودة علق كتير على الماسك، لانو ايلي شالوحي حاطط ماسك، نهار متل الـ بيتزا، نهار مثل الهمبرغر ….
عزيزتي الدراما خبّريني شو في عندك ممثليين بزقفوا لبعض، بعرف عندك كتّاب بمثلو على بعض، وكتّاب بيسرقوا من مسلسلات اجنبية، هلكونا صراحة، ما تركوا نسخة تركية ما اقتبسوا منها.
عزيزتي الدراما اللبنانية ما احلاكي بلا ممثلين سوريين والله بيطلع منك، ولو رصيف الغرباء مش غلط.
عرفت انو نادين جابر مبسوطة بحالها كاتبة، برافو، لما بلشت برمت بيوت فنانين بيت بيت وصوروا معها بيلوت، وبس صوروا ومشي الحال، جابت إنتاج ما قبل بممثلين خريجي وأساتذة معهد، وفضل كريستينا صوايا.
وعلى سيرة كريستينا صوايا شو قصتها المدام، حدن يقلّها ضروري نرتاح، ونشيل التاج ونردّوا على الجارور خلص حبيبتي، خلص فن بيكفي هالقد، بكفي مسخرة، يا اختي من وين بتجيبي كل هالثقة.
وانت نادين جابر ما نسيتك، وقّفي تسرقي مسلسلات تركية، آخر ضحية الك “حتى الممات” مسلسل تركي حولتي الى “لا حكم عليه” والمصيبة انو هلق كاتبة مسلسل “حتى الموت” الله يستر من وين مسروق.
عزيزتي خلي كلوديا و كارين يعلّموك كيف بتكون السرقة.
