سهى قيقانو لا تسكن في النبطية ….
انا قلت بهالصيفية الحلوة ، بدي آخود فرصة ، انّو صيف وبحر ومشاوير وانسى فيها المشاهير ،ولكن استوقفتني حلقة طوني خليفة والسؤال المحرج اللي طرحو على الممثلة سهى قيقانو.
سهى حبيبتي ، يخرب ذوقك شو وقحة وشو جريئة ، بدكن للصراحة حسّيتها بلا ماسك ، وصريحة ، ولو انو انا ما بوافقها باراءها، ولكن، ما كذبت متل باقي الممثلين، اللي بواجهة الثورة ، وبيبيضوا وجه بالوسط الفني وبسايروا وما بيعرفوا ياخدوا طرف ….
سهى بتحبّ جبران تصطفل، وجيسيكا عازار بتحب جعجع كمان تصطفل…
ولك جيسيكا صرتي ضرة ، روحي يا قوتجية يا منفتحة انت ، ولك القوتجيي بلبنان ووين ما كان بالعالم ،لانو اسم الله المنتشرين ،كتار اذا بنتهم معها بالصف واحد اسمه علي ما بخلّوها تحكي معه …معليش ما نتخبّى ورا اصبعنا ،القوتجي متعصّب وكتير ،وانا بعرف كتار …..
سامي جمّيل تزوج من مسلمة ، ايه بس عمّدها وتزوج زواج كنسي….
حبيبتي انت ،المسلمة اليوم ما بتقبل تكون ضرة ، حضري شي مسلسل مصري وشوفي كيف المصريين اللي انا انا بموت فيهم، وبحبن جنون ، كيف بينظروا للضرة وكم من الانهيارات بتصير بس تعرف المراة انه زوجها تزوج عليها… ولو انت بعدك عايشة زمن باب الحارة ، وحارة القبة ، ولك حتى بحارة القبة الضرة ما انهضمت بسهولة….
ما تحكيني بالشرع، ولا بأي دين ، لانو صار وقت ينعمل تجديد للشرع ولكل الاديان صرنا ٢٠٢٢ ، عيب والله عيب والعيب اكتر انو صبية حلوة شو ما كان دينها تقبل تكون ضرة ….
سهى ما كتير تنادي بالعفة ، معك حق ،الوسط الفني مش كتير نضيف بس انت من الوسط الفني ، وأكيد بتعرفي خبار الكل ما انت صديقة الكل ….
سهى كتير متطرفة وعنصرية ، ولك انت بتعرفي انو بأوروبا واميركا وكندا و استراليا ، النبطية مخلوطة مع الأشرفية…
طوني خليفة ، تمام بليق ، خففولي شوي برامج الرايتنغ، بدي صيّف ، مش عم بلحّق عليكم ، انا هالجمعة بدّي فول السيارة بنزين ، مش فاضية احضر ، وبعدين كل الاوتيلات مفولة بلبنان ، رايحة سياحة على تركيا، مع انو كل بضاعتن عنا ….
الى اللقاء فرصة شوي الى ان يصدر شيء طارق ، وقلبي لا يتحمل ، سهى خلص ولا مقابلة قبل ما ارجع ، تمام تروك مريم نور مع كواكبها ورجاع بيناتنا….
