المخرج فيليب اسمر عم يسأل متابعينو على انستغرام اذا مع أو ضد جزء تاني من مسلسل 2020 او مسلسل للموت .
ليك حبيبي فيليب انو اذا قلنا ،لا ، رح توقف تعمل جزء تاني؟، أصلا ما بعرف لشو بدكن تعملو جزء تاني . انو مسلسل ٢٠٢٠ قفلة القصة ، مات قصي البطل ايه شو بدكن ترجعوا تحييوا؟ ويرجعوا يضهرو كل المجرمين من الحبس ؟ هلق يمكن منطق تكملوا لانو للاسف ،وللامانة ، شخصية متل الحوت أكيد ما رح تفوت ع الحبس عنا بلبنان …على كلن نهنهة نادين وعفو الله قصي برأيي ما بيحملو جزء تاني لانو زادوها شوي كتير ، والمضحك انو ما عاد معروف مين كاتب النص وشو مكتوب بالنص ، شي بيقولوا نادين،وشي بقولولو بلال ونادين انجئ كاتبة ٢٠% عم بحكي عن نادين جابر ، ونادين نجيم كمان الها بالكتابة وبتعطي رأيها، يعني الكتابة صارت مطبخ ،رزق الله ع ايام مروان نجار وشكري أنيس فاخوري…هلق صار المنتج بدو بقول اذا بعيش البطل او بموت ….
اما بالنسبة لمسلسل “للموت “يا دللي انا مطيّنا مطيّنا فكرنا ليكون ٣٠ حلقة النا ماشي ، هلق صار في جزء تاني .ايه بس ماغي طمنتنا انو مش لرمضان ومعقول يكون ١٠ حلقات ، هالشي بيعني انه في فكرة براسها لنادين جابر ،فكرة فيها تكون حلقة ، بس نادين بتشط هلق فيها عشرة ، مش غلط يلا منتسلى…
هيدا كوم،وكلو ولا تصير نادين جابر كلوديا مرشليان بالمستقبل كوم،وما تعود تعرف توقف مخيلتها ويصير يشطح معها المسلسل ٦٠ حلقة ، راحوا بعد ما رجعوا … الله يكون بعون الممثلين حرام أكلوا الضرب ، قلبي معهم بدن يشتغلوا، وبديع بعدو راكض ورا كارين … يا دللي يا كارين لو بتروحي انت وكلوديا هيك شي سفرة مطولة شوي بلاد الله واسعة، وبترتاحوا شوي وتريحوا الشاشة والمشاهد … كتير هالقد … راحوا كلوديا مرشليان وكارين رزق الله.
