بعجقة المسلسلات الحلوة،
-أطلت مايا دياب في حوار، انو أحسن ما تغني، زعلت عليها كتير، صدمتني قال ممنوع تفوت على أميركا، إرهابية البنت،
والله يا مايا هني اللي خسرو ، أكيد خسروا مايا دياب تتسوق عندن، بدك الحقيقة ما في شي بأميركا، التسوق بأوروبا أحلى.
-المصيبة ببرامج الحوارات مش مايا دياب، مايا حلوة وسريعة، وتيابها حلوين، بس المصيبة الكبيرة أيمن زبيب،
يا جماعة، يا منتجين، يا رودولف يا حبيبي هيدا ما بيعرف يحكي، هيدا بغني وبس، لا لا ما بصير بدو عروس، وبدو يمثّل دور فنان انو غير دور مارح يعرف… ومش غلط اذا مسرح….
والأضرب من هيك صديقتو، الممثلة الكوميدية اللي ما بعرف وين مثلت، يمكن بشي برنامج بس انو اكيد ما في شهرة، ما وصلت بعد لمدام فهيمة، لك يا حبيبتي انت وين عم تدرسي كتابة سيناريو، بالأول اكتبي سيناريو لـ أيمن صديقك كرمال يبين عـ الساحة وساعتها لكل حادث حديث.
لا وشو حلو مايا دياب ممنوعة تفوت على أميركا، وأيمن زبيب عم يشتغل على إقامة بكندا، بدو ينقل على كندا، يللا منيح مع انو رح يريحنا ويرتاح من المقابلات، معقول يتعلم كلمتين فرنسي او انجليزي،؟
لانو هو عاش فترة بالمانيا وما أخد الباسبور، وعم تسألو ليش؟ لأنو ما صاب ولا كلمة ألماني.
أيمن حبيبي، انا بنصحك تضلك بلبنان وتشتغل على العربي، يعني تركّ أكتر عـ العربي وبعدان منحكي بمقابلات وغيرها…
أيمن زبيب انت غنّي وبس ….
رودولف انت ما فيك تحب كل اللي عم تستضيفن، والله والله والله يكون بعونك، أوقات بحس بدك تغشى ضحك، بس أكيد أكيد فريق الإخراج بكون عم يطلّع ببعضو وعم بيقول لازم نطلع اعلان وفهمكن كفاية.
-رامز جلال ما بعرف اذا في حدن غيرك عم يحضر برنامجك، بس الحقيقة انو انت مش مرتاح، وبرنامجك بدوّخ، وشكلك مش كووول أبدًا، شكلك لعبة زهقوا منها الولاد ورشينها الوان …..
