يا فضيحتك يا فهيمة، قال شو قال عم بقولوا نادين نجيم بدها تنغرم مظبوط بقصي الخولي، لا ولو فاجأتك مووووو؟؟؟؟؟؟
بس سؤال امو لقصي لبنانيي وخيو لبناني، وكل محيطو لبناني هو ليش بيحكي سوري، ليك حبيبي لو أمك سورية وبيّك سوري وربيت وعشت بلبنان رح تحكي لبناني بالاخر… والعكس صحيح، هيدا يوسف الخال أمو سورية بس هو بيحكي لبناني لانو عاش بلبنان…
المشكلة ابدا مش بشخص قصي، لانه هو فعلا ممثل أكاديمي رائع ومحترم، ولكن المشكلة بالتوليفة، مش زابطة،
ونهنهة نادين صارت كتير كتير مستعملة بمحلها ومش بمحلها، انو خلص يابا لاقينا كلمة وعملناها ترند…
رندة كعدي سنستفقدك، بس يلا منشوفك بغير مسلسل مش غلط …
-مسلسل للموت، بعد في شي حدن مش معقّد، يا دخيلكم النص، انو فهمنا، عملنا مولينكس لكذا فيلم أجنبي، بس والله مش زابطة الخلطة،
مشهد فيفيان انطونيوس اللي منحبها كتير واللي اشتقنالها كتير، معقول بردّنا على زمن “بلانكافلور” المسلسل المكسيكي، اللي بيخفوا بلانكافلور تحت الارض… يا دللي انا بطلّنا نعرف كيف بدنا تشويق، بس هيدا ما عاد تشويق خلصنا لوووو، مسلسل كتير مركّب ولا شخصية واضح خطها، وكل شخصية معقّدة اكتر من التانية، كلن يعني كلن الى مستشفى الأمراض العقلية…
-بس لما تشوف مسلسل جمهورية نون، اكيد بدك تقول واو شو حلو للموت، ولما تشوف رصيف الغرباء، بتنتف شعر راسك وبتنهنها على نادين نجيم.
في مسلسلات ما فيك تحكي عنّا، مش مسموح، مش مقبول، متل كأنو في بوجك شخص غير قابل للنقاش… وللأسف في كتير مسلسلات لبنانية غير قابلة للنقاش…
-منى زكي بكيتيني يا شطورة، زي ما انت عاوزة تتكلمي انا مش قادرة ما اتكلم عن حلاوتك وصدقك، شو هالنص الحقيقي، القريب، ترفع لكم القبعة حلقة بعد حلقة وانشالله نرفعها كمان بعد ١٥ حلقة.
-مسلسل يسرا، خلص ؟ خلاويص؟ وهو انتهى بحلقة ١٥ ؟ لانو للصراحة حلو أوي لو انتهى هنا هو، ما بعرف بعد في ١٥ حلقة كيف بدو يكمّل، ولو منبلش مسلسل جديد بقلب مسلسل…
-بس دخيل الله تمسيح الجوخ على تويتر لو منخففو شوي. هلق نادين نسيب نجيم طلعت متواضعة، ييي ييي ولو، لأ بدنا نروق شوي، خلصت ايام التمسيح يا جماعة، هيدي نادين شو فهمنا؟؟؟
-بعدان نازلين فينا رندة كعدي، رندة كعدي، اليوم لعرفتو انو رندة كعدي ممثلة قديرة، ولو كان لازم قصي الخولي يكون ابنها لتشوفوها؟؟ ظرندة كعدي انا من زمان بآمن بموهبتك
-كارمن انت أبدعتي في ٢٠٢٠، بس شو بدك قول عن رصيف الغرباء. بدنا نشتغل بدنا نعيش وعمرو الفن ما عمّر بيت.
-عايدة صبرا قايمة الصرخة وبدّها تجلّس اللي ما بعمرو رح يجلس، بدك نقابة حبيبتي؟ بدك الممثل يشتغل على حالو؟ بدك يثقف حالو؟ وين عايشة عيود؟؟؟
عايدة صبرا من هلق ولا شركة إنتاج رح تقلك تعي هيدا الدور ما بشيلو الا انت، خلص انسي، انت قلتي” شغلت اللي ما الو شغلة صار التمثيل”.
لو اصحابك يا عايدة بيوقفوا معك وبيطالبو بحق متلك ،كان التمثيل بالف خير.
-بس استاذ كميل سلامة جلالة قدرو، اللي علّم معك، هو اللي فوّت رولا بقسماتي على المسرح وجابها تمثل معو مسرحية، كيف بدو يقلك انا معك؟
ونقولا دانيال، ممثل قدير بس اذا حكي ما بعود يشتغل.
-غبريال يمين عم بمثلّ مع سيرين هلق، سيرين اكتشاف استاذ شكري أنيس فاخوري اللي ما خرب الوسط غيرو. ليش بدنا ننسى لما كاتب مهم هو اللي أعطى الفرصة للموديل يدخلو عالم التمثيل، والمنتج مروان حداد، هونيك البلا، شكري توقف ولكن مروى غروب تستمر، وآخر اكتشفاتها ابنة عاصي الحلاني.
واللي بضحك انو كانوا يقولوا مروان نجار، تعتير، ويضحكوا بجلساتهم. بس مروان نجار قدم نص محترم، قدّم طلاب الجامعة، قدم ممثليين مش موديل.
عايدة صبرا شو بدي قلك، بدك ممثل شاطر، لا تندهي ما في حدا ….
