شاعر – مونتريال
قصيدتي عنوانها عمر
منبّه إلايام فيقني
من بعد ما كنت بحلم سارح
خايف قطار الوقت يسبقني
وبكرا حياتي تصبح مبارح
خيط الأمل بالكون علقني
لكن أنا بكون الفنا نازح
وخيط القلق بيعود يجرحني
وقاشع بعيني شاشة إلايام
عليها بشرها قادم ورايح
ومنبّه إلايام قلي لوين
حلّك بقا توعى من السكره
منتسابق بهالكون عالميلين
وفينا بيبرم برمة البكره
وسرّ البشر والناس عالحالين
وسرّ الدني بعقولنا فكره
لما منجي ومنروح عنا دين
ولما على مخدة قلقنا ننام
بيجمع قلقنا مبارح وبكرا
ولما على تراب الدني نمشي
منشكر إله الكاينة ومنقول
الإنسان عا خدود الأزل نمشي
ووجود لكل البشر معمول
وكل ما إنغمشنا من الألم غمشي
يعني الألم بوجودنا مجبول
نحنا بجبلة هالدني كمشي
من آدم وحوا وبداية كون
هالكون سرّو غامض ومجهول
