إلى عايدة صبرا …
عاملتيلي ثورة على الفن بلبنان وبدك تبلّشي شطف البناية من فوق لتحت.
حبيبتي من وين هالثقة، دخيلك خبرينا، لنخبّر الفنانين يروحوا يشتروا شوي، خصوصا انو هيدي اللي عندك مش مضروبة لا بحمرا و لا ببوتوكس متل بعض فنانينا.
هلق انت بثورتك شو ناطرة يا أستاذة، ناطرة شي فنان يقلّك معك حق عايدة صبرا اللي عم بصير مش مسموح،
معك حق عايدة لازم النقابة تحمينا،
معك حق عايدة اللي مش دارس تمثيل، مش بالسهولة لازم يصير ممثل،
معك حق عايدة، في فجور وعهر، وناس بتسرق نصوص، وناس ما بتعرف تمثل، والخ الخ الخ
بس اكيد انو انا اللي معي حق يا عايدة، معي حق انو ولا فنان رح يوقف معك، ما بياّثر لو انهان بالتصوير، فدى الشهرة، ومين عامل حساب للاهانة،
لو في فنان بيجي مش حافظ، ما حدن رح يقلّو شي لانو اسمه بييع،
والممثلة اللي على الكلوز تبعك بتروح بتشرب سيجارة، وانت يا شاطر دبر حالك.
ما بياثّر فدى الشهرة “والشهور” على الشاشة، ولو انا درّست تلاميذي على مبادىء وانا بشتغل بعكسها، ما بياثّر لا بدّي وقّف شغل لأرفع الصوت معك عايدة صبرا.
حبيبتي إذا لقيتي فنان يعملك لايك انا بقلك برافو .
اذا فنان كتبلك تعليق انه معك حق، بتكوني خرقتي منظومة.
اذا فنان عملك شير بتكوني عملتي ثورة.
هاو فناني الثورة، يثورو معك بالاول، يغيروا نقابة الفنانين قبل ما يغيروا وطن.
انا ست فهيمة نصيحة مني الك، عايدة صبرا، اذا التلاميذ لي درّستيهم بالجامعة، اليوم ما رح تلاقي مين يعملك لايك.
الدني مصالح يا أستاذة، انت خلص، بطّل الك شغل بلبنان، يا ديعانك رح نشتقلك على الشاشات.
مين بيسترجي يعمل لايك ل عايدة صبرا اليوم هو بطل . . .
عايدة رح تقطعيلي برزقي نسيني اذا بتريدي، وما تجيبي بليز سيرة مدام فهيمة انا بدي الشهرة، ما بتهمني حرية أفكارك، وفكرك المتحرر، انا بدي كون ستار.
دخيل الله على الثقة لي عندك، وزعي منها شي معلّقة على الماشي للفنانين لي عنا بلبنان، لانو الثقة لي عندهم فعلا مضروبة، ما بعرف من وين عم بجيبوا الثقة لي بيطلعوا فيها على التلفزيون….
عايدة عفوا بس خلص بلوك انت، لانو انا ما بدي قول الحقيقة، انا بدي كون مشهورة ….
تحيا الشهرة ولي تموت الكرامة…..
