أحمد عيسى: 4 آب مش بس اللبنانيي بكيوا بكل أنحاء العالم،لك العالم كلوا بكي

بقولوا يلي بكون بعيد عن العين بصير بعيد عن القلب
الا الوطن …
كل يوم بمرّ، ونحنا بعاد ومتغربين عنو، بزيد حبنا الو !

انفجار ٤ آب…
هيدا النهار مستحيل ننساه
بهيدا النهار انكسرت قلوبنا وتحطمت كثير من الاحلام وانتهت حياة كثير من الابرياء.
أبرياء مش شهداء

بهيدا النهار مش بس بكيوا اللبنانيي بكل أنحاء العالم
لك بكي كل العالم، ايه كل كل العالم، الا الطاقم السياسي عنا!!

من أصعب المشاهد اللي بتمرق بحياتك، انك تشوف بلدك ووطنك عم يتد~مر واحبابك عم “يتبخروا” وانت بعيد وعم تتفرج.

قلت بهيك ظرف البكي ما رح يفيد
خلونا نتحرك
خلونا نعمل شي.

فكرت، وقررت ما اتفرج، لازم أعمل شي، لازم ساعد بأي طريقة، وقلت فيني أعمل حملة تبرعات ونجمع فيها مبلغ ونبعتو للمحتاجين بلبنان وخاصة بهيك ظروف، وشو كتار صاروا المحتاجين ببلادي

ولكن حسيت انو بهيدا الموضوع، يعني التبرعات، منكون عم نفيد لفترة قصيرة بس، وكمان قلت انو هيدا الشي ما بيشبهنا، يلي هو للأسف – الشحادة-.

نحنا شعب بحب الفن وشعب خلاّق وعنا كثير من الابتكارات.
ففكرت
وهون بلشت اول خطوة بمشروع ليرتنا.
يلي هيي جمع العملات النقدية القديمة من فئة الـ ٥٠ ليرة واستخدامها لصناعة أساور وعقود وغيرها وبيعها أونلاين بكل انحاء العالم وكل الارباح من المييعات تعود للبنان.
بهيدي الحملة منكون عم نحرك الاقتصاد اللبناني ونشغّل يد عاملة قدر المستطاع.

بفضل ربنا الحملة والفكرة نجحت وحققت أصداء ما كنا ‏متوقعينها وهيدا الفضل كلو بيروح لكل شخص ساهم وآمن بهالمشروع ،وتحديدا بهالحملة اللي، وبعد شهرين من إطلاقا قدرنا نبعت full container على لبنان بالتنسيق مع الحمعية الكندية lebanon strong،واللي من خلالها قدرنا نوصّل رسالة مهمة “انو لبنان بلد المحبة والسلام والتعايش ورح يضل متل ما هو بقوة وجهود كل ولادو وين ما كانوا بالداخل او وين ما كانوا منتشرين”

وجعنا كبير يا بلدنا بس نحن مآمنين انك رح ترجع أحلى وأقوى من الماضي.